غابة

"إحساس الغابة"

إحساس طبيعي و موجود من زمان و عشان كدة مكنتش بكتب...بجد قرفانه و حزينة من اللي بيحصل..و شابفة كل حاجة عادي..طبيعي تحصل..حزني بيزيد يوم بعد يوم..زاد يوم ما مجلس الشوري اتحرق...بيزيد أكتر لما بفتكر العبارة...إحساس " القرف طفح " بعد موضوع هشام طلعت مصطفي..مش عايزة أتكلم... أنا بتفرج بس..إيه القرف ده..بجد..إيه كمية القرف اللي بيحصل ده..أنا بحب البلد دي أوي..بدأت أكرهها..بس هي و الله ماليها ذنب في اللي بيحصل..ناس جايين فوقيها مبهدلنها..أنا حساها بتشتكي..مصر بتشتكي يا جماعة من اللي بيحصل..كفاية نهب و قرف و سرقة و كدب و استغلال نفوذ و ده علي حساب ده و لصالح مين و علشان مين و فلوس و تحريض و قتل و إهمال و زبالة..بجد كفاية..بتفرج من بعيد و قرفانة..مبقتش بلدنا..بقت بلدهم..مبقتش بتاعتنا خلاص..كل سنة و انتو طيبين..إحنا فعلاً طيبين..طيبين أوي كمان ..الغابة طلعت أرحم بكتير

يلا..كان الله في عون كل واحد بيحبها بجد......

تحديث:

لا تعليق علي كارثة الدويقة

مش فاضل حاجة

إنا لله و إنا إليه راجعون

عدنا

تفتكرو هل فعلاً مفيش فايدة…..عشت الحلم لمدة ساعة…كاملة …بحالها…في مكالمة تليفون…

جاله تليفون .رد عليه..

أيوة…مين معايا…
…………….
أه إزيك يا يوسف بك….
(بعد السلامات و التحية…دخلو في الموضوع)
……………….
أنا و الله الموضوع مبقاش في إيدي….حضرنك هتتعرض علي التحقيق قدام وكيل النيابة…
……………….
معرفش و الله هو مين.…..
………………….
اسمع إيه بس سيادتك…. مرتبك اللي كان 5 ألاف بقي 12 بقس 24 بقي 47 ألف …فلوس ناس دي..فلوس الشعب
…………………..
حضرتك خلي مشروع شرم الشيخ ده علي جنب علشان ده مصيبة لوحدة…..دي فلوس شعب..
…………………..
وكيل النيابة هيناقش كل واحد من أعضاء الجمعية في اللي هو كتبه…و أنا مقدرش أقول غير اللي أنا كتبة..
…………………..
يا باشا مينفعش الكلام ده……أنا مفيش في إيدي حاجة و الله….دي فلوس ناس….

…….(بعد ساعة من البلاوي و أرقام بالملايين و أكيد الأرقام دي صغيرة…علشان دي شركة…حتة شركة….و مخبيش عليكو أنا كنت في سعادة غامرة….و أنا شايفة واحد قدامي بيحارب الفساد و متمسك بموقفة…و سرحت في كيفية تأنهته..لما يقفل أقوله حاجة..و لا أدعيله و لا أعمل إيه…و رجعت للنقاش تاني…و علي نفس الكلام …- مال ناس …مال شعب -…الله الله الله…و تخيلت لو كل الناس في مصر كده…دي مصر تبقي عماااار…لحد ما فوقت...و يا ريتني ما فوقت....فوقت علي رقم تليفون بيت المحارب الشجاع…طب لييه رقم تليفون البيت..ما كنا كويسين…
………………
أنا في المواصلات…مش عارف أتكلم…كلمني علي النمرة دي ……..
تفتكرو ليه عايزه يكلمه في البيت؟؟؟!!!!
مفييييييييييييييش فايدة….سعد زغلول

!!!فتحت الجرنال

.فتحت الجرنال(علي غير العادة)....و المانشيت المعتاد لكل سنة...شكاوي من إمتحان الفيزياء للمرحلة الثالثة للثانوية العامة...وغرقت لمدة 5 دقايق في الذكريات المؤلمة للثانوبة العامة و جتلي حالة إكتئاب لا إرادية....و الشعور المؤذي اللي الواحد كان حسة - و أنا بذاكر..و أنا قاعدة مع المدرس و بنااااام...و أنا رايحة المدرسة ... و أنا جاية من المدرسة وأنا بمتحن و شعوري إنه مكنش إمتحان ..لأ دة كان إختبار لتعذيب النفس...و جو اللجنه المقلق..و رغي المراقبين...و المراقبات طبعاً...كانوا زي النسمة ..والطبيخ و العيال و أجوازهم...كنت بحب حكاويهم أوي...و ساعات كنت باخد بريك من الإمتحان(من كتر سهولة الإمتحان و مخلصاااه كله طبعاً..إوعو تفتكرو إني كنت محتاسة..لأ لأ...مسمحلكووش) و أقعد أسمع الحكاوي دي....كنت بندمج معاها أوي..أهو يمكن تنفعني لما ربنا يكرمني كده.... و إحساسي دايماً بعقدة النقص...من باقي البنات في الفصل..( المتفوقات طبعاً)..و أقعد أفكر...بيذاكرو إمتي؟..طب يبنامو كم ساعة؟...طب مامتهم و باباهم يبزعقو كدة كل شوية زي عندنا؟؟...طيب يمكن معندهومش عيال صغيرة علشان كدة وقتهم مش بيضيع ؟؟ و النظرة لهم علي أنهم عباقرة من كوكب تاني..دة كلة كوم...و دعوات و كلام المشجعين..كووووم تاني..كل شوية التليفون يضرب "هاااااا...عملتي إيه"...و نظرة الحسرة في عيون والدتي...(يعني و الله يا....لبخت شوية) و طبعاً تظهر كلمات المواساة من الطرف التاني...." معلش...تتعوض إن شاء الله في اللي جاي"....و إعادة التصحيح...."البنت اتظلمت" (بس إيه...لحقت من الفرخة ورك...قصدي لحقتلي درجة في إعادة التصحيح...مش بقولكوا كنت مقفلة الإمتحان) ويا سلام علي رعب التنسيق..و المرحلة الأولي (اللي مكنتش فاهمة هما ليه متضايقين اني ملحقتهاش..و ألف علي أفراد البيت نفر نفر...يعني إيه مرحلة أولي يا جدعان..إنتو متضايقين لييه....هو ميين اللي ماااااااااات) و أدينا دخلنا الكلية....و بندم علي كل لحظة تعبت فبها أعصابي...وحرقت فيها دمي..يلا...

أهو كلو برتقال...

سافر حتموت محروق

.طبقاً "لسياسة الأرف" المتبعة معانا.. (شعب الغلابة)...ألا و هي

""إقرف إقرف ..قد ما تقرف..دلوقتي يقرف...و تبقي عال ""
....ما علينا...مش هنعد نقرف في بعض كتير..نخش في الموضوع

....راكبين القطر...و فجأة القطر وقف

ايه ده ...في ايه؟؟!-
....لأ أبدأً...عربية 9 بتولع-
....ايه ده بجد يا جماعة....طيب...ربنا معاهم....طب يا جماعة كانت يتولع بجد....مش كدة وكده-

....أة بجد و الله..و الدخان كان طالع منها..بتتحرق بتتحرق يعني-
....نزلنا من القطر...استنينا شوية

بعد كده خلاص ...يلا أركبوا بقي...شوفتو الموضوع بسيط ازاي ...عربية ولعت و هنكمل...بس هنكمل من غير ما تتنفسوا....قصدي من غير تكييف...و اللي عايز يركب أهلاً و سهلاً و اللي مش عايز..الحوايط كتير...إختار...
( انتهز الفرصة...قاللك إختار...بقالنا زمن مسمعنهاش)...يلا ..حيطة أهي علي اليمين و علي الشمال و في وشك بالظبط...
-معندناش أكتر من الحوايط...ده أحنا بنبنيها مخصوص علشان الناس تخبط راسها فيها. عايز حيطة كام في كام..متبيضة و لا علي المحارة ؟؟ مش حارمنكو من حاجة أهو..و يبقي فيها طوابير..و الخبطة بربع جنيه..وواحد عايز يخبط راسه و مش لاقي حيطة...ده ساعة أزمة الحوائط و الطوب في البلد...زي باقي الأزمات(هو في ايه تاني مفيهوش أزمات؟!)...
و في الأخر يقولك ..."عايز تسافر يا حبيبي...يا تستحمل تموت...يا تدعي ...إنها تتباع و يتعدل حالها...(يعني مش ترضي بس...لأ..تدعي كمان...)
صدق اللي قال....مش فاكرة بصراحة قال ايه...بس هو قال حاجة...فيها كلب...و ديل و حاجات كدة...الله...مش فاكرة...نسيتها زي ما كلنا بننسا حاجات كتير يعني ... مجتش عليها يا جماعة....ما احنا نسينا السبب اللي خلانا كده...(كده دي ترمي و تحدف كمان ل حالنا اللي إحنا عايشين فيه)....و ياما نسينا حاجات كتير تانية......عَدولي

حمد الله علي سلامة الشرطة

في بلدنا الجميلة- طبعاً-....و المنظمة-بلا شك-....وحط تحت منظمة 5000 خط...

عمرك ماهتلاقي شوارع زحمة...و لا ناس بتف في الأرض و لا خناقات و ضرب و بهدلة...

و لا شحاتييييين...و لا حرامية....ولا أي نوع من أنواع البلطجة..و لا من الشرطة و لا من غيره..الشرطة عندنا حنينيينه

...و بقت الحنية و الجمال في طبعها...متعووووودة...دايماًًًاًاًاًاً

....ولا أي حاجة من الحاجات الوحشة دي....إحنا الحمد لله أبيض يا ورد..

.و الناس اتعودت انها تمدح في الحاجات الحلوة دي...

.... ما هو لازم الواحد يقول الحق برضه..اللي ليييييييييييييييييييييه و اللي عليه

...و حاجات كتييير حلوة أوي ..أنا خايفة بس نتحسد من كترها

...و منين ماهتركب تاكسي هتسمع أغنية جامدة أوييي

!!!!!!!!...هي دي هي ....فرحة الدنيا

3

طبقات..و أستك

داخل المواصلة اليومية الإجبارية..

مترو الإختناق

.....اجبارية لأسباب كتيرة منها...
السرعة في الأداء
(الانجاز في الوقت(سكشن 9 اللي محدش بيلحقة أصلاً و المصير المعتاد و هو الطرد

والبرمجة الومية ...مش هقعد أفكر أركب ايه ولا ايه....أي حاجة و السلام..

أول ما تدخل (لو دخلت أصلاً...

هتلاقي المترو متقسم ل 3 طبقات
الطبقة العليا
.....و هي مكونة من الأفراد الجالسين و المستريحين...و كل من لقي له مكان و يصعب عليه الإستغناء عنه الا عند المحطة...-اللي مبتجيش أصلاً
الطبقة الوسطي
....و هي عبارة عن الناس المستنية الفرج(و طبعاً مش مستنيين و هما قاعدين...واقفين أكيد و رجليهم واجعاهم
الطبقة الدنيا
يعني... عبارة عن كوكتيل من اللي لازق في الباب و اللي الباب قافل علي هدومه....و اللي فقد الأمل و قعد علي الأرض ...كده يعني...
مرة ربنا كرمني ..
و كنت من أفراد الطبقة العليا(علي غير العادة أكيد)...

و دخلت واحدة أجنبية.... في محطة (مش أي أي).....المهم...ناهيكو عن النظرات اللي مفرقتش البنية...

( و عن الكلام عن لبسها و عن و عن و عن....جت وقفت جنبي.. و قالتلي حاجة...(مفيش أي مشاكل ..

...فاجأه...لقيت أحد المتطوعين...(الست اللي قاعدة جنبي)...قامت احتراماً للأجنبية....

و بكل معالم وجهها ...وجسمها.....و بكل ما عندها علشان تعبر عن الترحاب(طبعاً مبتعرفش انجليزي فلغة الإشارة..مفيش غيرها....

..... و تفهمها انها تقعد مكانها-أجنبية طبعاً...لازم نكرمهم -...بصراحة ...جاتلي حالة ضحك هيستيري

...."أصلي افتكرت حاجة...اللي الأجنبية قالتهولي...."حاسبي أمسك لو سمحت"...